वारूळ

 

तुम्ही कधी वारूळ बघितलं आहे?

भुसभुशीत मातीत बनलेलं...

कधी एखाद्या झाडाच्या आधारावर बनलेलं किंवा

एखाद्या दगडाच्या साथीला उभं राहिलेलं?

छोट्या छोट्या मुंग्यांनी बांधलेलं,

कष्टकरी कामकरी...

हळूहळू ज्या मुंग्या धान्य जमवत जातात..

वर्षांनुवर्षे ह्यांचे मजलेही चढत जातात

ह्यांच्या घराला नसतो पोकळ भपका

उंच चढलेला डोलारा नसतो कुजका

नाती गोती राजकारण ह्यावर नसतो त्याचा पाया

म्हणूनच तर न डगमगता उभा असतो डोलारा

वारूळ तसं फार कोणाच्या अध्यात मध्यात नसतं

सहसा कोणाचा पाय पडेल अशा जागी नसतं

मुंग्या करतात स्वतः पूर्ण प्रयत्न

कोणाला त्रास न देण्याचा यत्न

कधी जर तुम्ही वारूळ मोडलंच

आणि त्यांचं कष्टाळू घर तोडलंच

तर मात्र मुंग्या दयामाया करत नाहीत

पिसाटल्या सारखी होते तुमची अवस्था

करता मात्र तुम्हाला काहीच येत नाही

म्हणूनच मुंग्यांचं वारूळ कधीही तोडू नाही

मधुवंती गोडसे