रणवीर ब्रार

 "जेवण झालं का?"... एकच व्यक्ती असा आहे जो बिनदिक्कत हा प्रश्न विचारू शकतो आणि बायकांना अजिबात राग येत नाही.. कारण तो फक्त तेवढं विचारून थांबत नाही तर तो म्हणतो, "चलो मै सिखाता हु खाना बनाना!" आणि गालातल्या गालात हसतो! इतक्या handsome माणसाकडून स्वैपाक शिकायला कोणाला नाही आवडणार?

तो hot sensation आहे रणवीर ब्रार...

पंजाबी मुलगा जो आता आमची मुंबई मध्ये मराठी मुलगी बरोबर लग्न करून स्थाईक झालाय.. तो फक्त गोड दिसतो म्हणून नाही, तर त्याच्या अन्य गुणांसाठी पण जाम आवडतो.

ह्याच्याशी नक्की ओळख कधी झाली आठवत नाही पण कुठेतरी यूट्यूब वर एखादी रेसिपी बघून झाली असणार! आणि नंतर मात्र तो किचन मध्ये घुसला तो कायमचाच! जोश टॉक मध्ये मग त्याच्या आतापर्यंत च्या struggle ची गोष्ट ऐकली. अर्थात त्याच्या बद्दल ची माहिती आणि त्याचं जोश टॉक तर तुम्हाला इंटरनेट वर लगेच मिळेल...

रणवीर जेव्हा एखादी रेसिपी शिकवतो न तेव्हा त्या पदार्थाचं मूळ कुठे आहे,त्या पदार्थाला हे नाव कसं पडलं असेल आणि त्या पदार्थाच्या आजूबाजूला गुंफलेल्या कहाण्या सांगत असतो.त्यामुळे ह्याच्याकडून एखादा पदार्थ शिकताना हाताशी भरपूर वेळ ठेवा,कारण पहिल्यांदा तुम्ही फक्त रणवीर ला आणि त्याच्या बोलण्याकडे बघत राहता. बोलता बोलता तो कधी ingredients mix करतो ते कळत नाही...आणि बरं एक टेबलस्पून हे टाका ते टाका असं तो फार कमी सांगतो... फार फारतर, " नमक श्रद्धा अनुसार!"

एकी कडे त्याचं बोलणं सुरु असतं आणि एकीकडे रेसिपी आकार घेत असते.त्यामुळे कमीत कमी दोन वेळा vdo बघायची तयारी ठेवा.

गेल्या वर्षीच्या लॉक डाऊन मध्ये ह्याचे vdo बघितले गेले सर्वात जास्त वेळा! तो घरूनच सर्वांसाठी काही ना काही बनवत असे... कित्येकदा आपल्या घरातल्या लोकांना त्यात सामील करून घेत असे... एकदा तर त्याने त्याचे वडील, 'बाबूजी स्पेशल चहा' त्यांच्या समोर त्यांचं मार्गदर्शन घेऊन करून दाखवला होता. त्याच्या बोलण्यात,विशेषत: traditional रेसिपीज दाखवताना त्याच्या 'बीजी' म्हणजे आजीचे संदर्भ वारंवार येतात.रणवीर त्याच्या जेवण बनवण्याबरोबर त्या त्या ठिकाणची संस्कृती जोडतो.नवीन ट्रेंड्स आले की त्यात खरंच तथ्य आहे का की लिक्वीड पराठा सारखं ते पण रबरी चामट झालं आहे हे सांगायला तो घाबरत नाही.काही स्पेशल टिप्स आणि ट्रिक्स सांगाव्यात तर फक्त त्यानी आणि मग हळूच त्याचा तो फेमस डायलॉग, "आप कहोगे रणवीर आपने बताया नही! तो रणवीर ने बताया था!"

कडा प्रशाद बनवताना तुपात कंजुषी करायची नाही.

खाताना कॅलरीज कधी मोजयच्या नाहीत. हे त्याच्याकडून शिकलेल्या काही गोष्टी.

लॉक डाऊन मध्ये कसलाही गहजब न करता, जे तुमच्या घरी आहे त्यातूनच बनवा हे सांगायला तो विसरला नाही आणि त्याच्या रेसिपीज flexible बनल्या.

गणेशोत्सव च्या दरम्यान त्याने त्यांच्या घरी कायम मोदक घेऊन येणाऱ्या सेजल ना त्याच्या चॅनल वर बोलावलं होतं.मराठी सेजल ला अतिशय comfortable करून तुम्ही मराठीत बोला माझी आज मराठी ची परीक्षा आहे, असं म्हणून नवऱ्याच्या मृत्यू नंतर मिटून गेलेल्या सेजल ला परत एकदा बोलतं केलं.त्यांच्याकडून शिकून सगळ्यांना उकडीचे मोदक बनवायला शिकवलं. त्याचं हे साधं वागणं खरोखर भिडून जातं!

इतर chef बरोबर तुलना करणं बरोबर नाही पण रणवीर जितका त्याच्या viewers बरोबर कनेक्ट होतो तितकं क्वचितच कोणी होत असेल.

असा हा रणवीर साधासुधा पण तरीही गोड.. त्याच्यासाठी फक्त एकच प्रश्न, इतने क्यूट दिखने की रेसिपी क्या है? रणवीर आप ने बताया नहीं!

मधुवंती